WELCOME TO THE OFFICIAL BLOG FOR THE MINISTRY OF INFORMATION, YOUTH, CULTURE AND SPORTS: YOU MAY CONTACT US VIA WWW.HABARI.GO.TZ/EMAIL US TO maelezopress@yahoo.com WE ARE ALSO AVAILABLE ON FACEBOOK www.facebookcom/Habari Maelezo. KARIBUNI

Tuesday, 4 August 2015

Nishati ya Jotoardhi kuwa Mkombozi dhidi ya tatizo la umeme nchini.

Mkuu wa Wilaya ya Mbeya Mjini Nyerembe Munasa (aliyeshika kipaza sauti) akiongea na baadhi ya viongozi wa mkoani Mbeya (hawapo pichani) wakati alipofungua Warsha ya kampeni ya uelimishaji juu ya faida ya kuwa na jotoardhi nchini.

Mkuu wa Wilaya ya Rungwe, Bi. Zainabu Mbussi (kushoto) akielezea jambo mbele ya baadhi ya viongozi (hawako pichani) walioshiriki katika Warsha ya kampeni ya uelimishaji juu ya faida ya kuwa na jotoardhi nchini. Kulia ni Meneja Mkuu wa Shirika la Taifa la Uendelezaji wa Nishati ya Jotoardhi (TGDC), Mhandisi Boniface Njombe.

Baadhi ya viongozi wa Mkoa wa Mbeya pamoja na Watendaji toka TGDC wakifuatilia mada zikizowasilishwa wakati wa ufunguzi wa Warsha ya kampeni ya uelimishaji juu ya faida ya kuwa na jotoardhi nchini iliyofanyika 4 Agosti, 2015 mkoani Mbeya.
(Picha zote na Benedict Liwenga)



Na Benedict Liwenga-Maelezo (Mbeya)

Kutokana na ongezeko la mahitaji ya nishati ya umeme nchini, nishati itokanayo na Jotoardhi imeelezwa kuwa ni muhimu kwa kuwa itaisadia Tanzania kuondokana na tatizo la umeme pamoja na kupunguza gharama zitokanazo na matumizi ya mitambo ya kuzalisha umeme yenye kutumia mafuta.

Akiongea wakati wa ufunguzi wa Warsha ya siku moja iliyofanyika 4 Agosti, 2015 katika Hoteli ya GR jijini Mbeya,  Mkuu wa Wilaya ya Mbeya Mjini, Mhe. Nyerembe Munasa ambaye alimwakilisha mgeni rasmi Mkuu wa Mkoa wa Mbeya Mhe. Abbassi Kandoro ameeleza kuwa Kampuni ya Kuendeleza Nishati itokanayo na Jotoardhi, Tanzania Geothermal Development Company Limited (TGDC) ina majukumu ya kuhimiza maendeleo ya rasilimali za jotoardhi nchini ikiwemo kufanya tathmini ya rasilimali hizo kwa kufanya utafiti, uchunguzi juu ya ardhi pamoja na uchimbaji katika maeneo yaliyothibitishwa upatikanaji wa jotoardhi hilo.

Mhe. Nyerembe Munasa amesema kuwa TGDC pia ina jukumu la kufanya uendelezaji na ugavi wa rasilimali ya jotoardhi hadi kufikia kiwango cha kupata uhakika, lakini pia ina jukumu la kuuza mvuke kwa kampuni za umma pamoja na kampuni binafsi zinazozalisha umeme.

“TGDC wana jukumu kubwa la msingi la kusimamia maeneo ambayo yatabainika kuwa na jotoardhi  na kuhakikisha kuwa kuna upatikanaji wa uhakika wa mtiririko wa mvuke kwenye maeneo au mitambo ya uzalishaji wa umeme, “ alisema Munasa.

Aidha, aliongeza kuwa jukumu lingine la TGDC ni kuhimiza matumizi mbalimbali ya moja kwa moja ya nishati ya jotoardhi (Direct uses) ikiwemo matumizi ya viwanda, kupasha nyumba joto, kukausha mazao, mabwawa ya watu kuogelea kama shughuli za kiutalii pia katika Vitalu Nyumba (Green houses) kwa maendeleo ya nchi.

“Kampuni hii ina kazi ya kutafuta fedha kwa lengo la kuendeleza  rasilimali ya jotoardhi,  kwani huu ni mradi ambao unahitaji fedha nyingi, hivyo wana kazi ya kuandika maandiko mbalimbali ya miradi na kuyapeleka maeneo mbalimbali kama jukumu ili waweze kuzalisha jotoardhi kupitia miradi endelevu na yenye uwezo wa kulipa”, aliongeza Munasa.

Naye Mkuu wa Wilaya ya Rungwe, Bi. Zainabu Mbussi amesema kuwa nishati ya jotoardhi itaweza kuongeza ajira na kukuza uchumi kwa wananchi wa maeneo yake ikiwemo kuongeza fursa katika elimu kwa Wanambeya kwa kujua faida ya vitu vya asili.
“Kwa niaba ya mkoa wa Mbeya kwa Wilaya zote Nne ambazo mradi huu utapita, sisi ni faraja sana kwetu, sisi suala la mgao wa umeme halitatukuta baada ya uanzishwaji wa mradi huu, lakini mradi huu utatengeneza fursa ya elimu na kutoa uelewa wa Watanzania kuwa kumbe tuna vyanzo vya asili vinavyoweza kutusaidia katika maisha yetu ya kila siku”, alisema Bi. Mbussi.

Kwa upande wake kiongozi wa kampeni ya uelimishaji juu ya jotoardhi nchini, Meneja Mkuu wa TGDC Mhandisi Boniface Njombe ameeleza kwamba kutakuwa na vifungu vitakavyohakikisha kuwa jamii inashirikishwa katika mchakato huu wa utafutaji wa jotoardhi nchini ili kuwezesha upatikanaji wa ajira kwa jamii iliyoko jirani na eneo ambalo jotoardhi inapatikana.

Aidha, katika warsha hiyo ameeleza umma kuwa, hadi hivi sasa, timu yake ya Watendaji wa TGDC imepanga kufanya mikutano katika ngazi za kata mbalimbali mkoani Mbeya kwa lengo la kuendelea kutoa elimu hiyo ikiwa sehemu ya kuwashirikisha wadau wote ili kufanikisha mradi huo ambapo hadi hivi sasa viongozi wa kata za Isongole, Swaya na Ndanto wameshaelimishwa juu ya jotoardhi na manufaa yake kwa jamii huku kata nyingine zikiwa mbioni kuipata elimu hiyo.

“Tumefanya tafiti katika maeneo mbalimbali yakiwemo ya Kilambo, Mbozi, Swaya na kadri tumekuwatukifanya utafiti huu hapo mwanzo tumebaini na tumefika sehemu tumegundua walau uelekeo kuwa ni mahalai fulani na mwezi wa tisa tunakuja kujua sehemu halisi ya kuchimba jotoardhi”, alisema Mhandisi Njombe.

Mnamo tarehe 19 Disemba, 2013 Serikali ya Tanzania kupitia Shirika la Ugavi wa Umeme (TANESCO) ilisajiri kampuni ya kuendeleza nishati itokanayo na Jotoardhi, jina la kampuni likiitwa “Tanzania Geothermal Development Company Limited (TGDC).

Kampuni hii ilianzishwa kama kampuni tanzu ya Shirika la TANESCO ambalo linamilikiwa na Serikali kwa asilimia 100 na mnamo mwezi Julai 2014 TGDC ilianza kazi zake rasmi ikipewa jukumu la kuharakisha uendelezaji wa nishati ya jotoardhi nchini.

Waziri Mkuu Mhe. Mizengo Pinda afungua Maonesho ya Nane Nane Kitaifa mkoani Lindi.


Waziri Mkuu wa Jamhuri ya Muungano wa Tanzania Mhe. Mizengo Pinda akisalimiana na baadhi ya viongozi wa mikoa ya Lindi na Mtwara mara baada ya kuwasili katika viwanja vya Maonesho ya Nane Nane vilivyopo eneo la Ngongo Mkoani Lindi. Kauli mbiu ya Manesho ya mwaka huu ni “Matokeo Mkubwa Sasa, Tuchague Viongozi Bora kwa Maendeleo ya Kilimo na Ufugaji”. 

Waziri Mkuu wa Jamhuri ya Muungano wa Tanzania Mhe. Mizengo Pinda akifungua rasmi Maonesho ya Nane Nane kitaifa kwa kukata utepe katika  viwanja vya Ngongo vilivyopo Mkoani Lindi.



Waziri Mkuu wa Jamhuri ya Muungano wa Tanzania Mhe. Mizengo Pinda akielekea eneo yalipo mabanda mbalimbali ndani ya viwanja vya Maonesho ya Nane Nane kitaifa vilivyopo eneo la Ngongo Mkoani Lindi.

Waziri Mkuu wa Jamhuri ya Muungano wa Tanzania Mhe. Mizengo Pinda akiangalia burudani ya ngoma iliyoandaliwa kumkaribisha wakati wa Maonesho ya Nane Nane kitaifa yanayofanyika kwa mara ya pili katika viwanja vya Ngongo Mkoani Lindi.

Mkuu wa Mkoa wa Mtwara na Mwenyekiti Mwenza wa maandalizi ya Maonesho ya Nane Nane kitaifa Halima Dendego akisalimia kabla ya kuwatambulisha baadhi ya viongozi (hawapo pichani) waliohudhuria shereheza ufunguzi wa maonesho ya hayo iliyofanyika leo Mkoani Lindi.
Mkuu wa Mkoa wa Lindi Mwantumu Mahiza akitoa hotuba ya kumkaribisha Waziri Mkuu wa Jamhuri ya Muungano wa Tanzania Mhe. Mizengo Pinda kwa niaba ya Waziri wa Kilimo, Chakua na Ushirika Stephene Wassira wakati wa  ufunguzi wa Maonesho ya Nane Nane kitaifa yanayofanyika kwa mara ya pili katika viwanja vya Ngongo Mkoani Lindi.
Waziri Mkuu wa Jamhuri ya Muungano wa Tanzania Mhe. Mizengo Pinda akihutumia wananchi waliohudhuria ufunguzi wa Maonesho ya Nane Nane kitaifa leo katika viwanja vya Ngongo Mkoani Lindi. 

Waziri Mkuu wa Jamhuri ya Muungano wa Tanzania Mhe. Mizengo Pinda akisalimiana na wa Afisa Uhusiano wa Mfuko wa Pensheni wa PPF Mwajuma Msina (katikati) wakati wa Maonesho ya Nane Nane kitaifa leo katika viwanja vya Ngongo Mkoani Lindi. 

Mhasibu kutoka Idara ya Pensheni Wizara ya Fedha Imelda Mzatulla akitoa maelekezo kwa mmoja wa wageni waliotembelea banda la wizara hiyo wakati wa Maonesho ya Nane Nane kitaifa leo katika viwanja vya Ngongo Mkoani Lindi. 
Mchumi kutoka Idara ya Bajeti ya Serikali Wizara ya Fedha Prosper Fivawo akimsikiliza mgeni aliyetembelea banda la wizara hiyo wakati wa Maonesho ya Nane Nane kitaifa leo katika viwanja vya Ngongo Mkoani Lindi. 

Baadhi ya wananchi wakimsikiliza Waziri Mkuu wa Jamhuri ya Muungano wa Tanzania Mhe. Mizengo Pinda akitoa hotuba ya ufunguzi wa Maonesho ya 22 ya Nane Nane leo katika viwanja vya Ngongo Mkoani Lindi.


Na Eleuteri Mangi-Lindi

Maonesho ya Nane Nane nchini yamekuwa shamba darasa ambalo wananchi wanakutanishwa kujifunza masuala mbalimbali ambapo wakulima na wafugaji na wananchi kwa ujumla wanaweza kutoka na mambo kadhaa kwa manufaa ya kuongeza kipato cha kaya na taifa kwa ujumla.


Kauli hiyo imetolewa Waziri Mkuu wa Jamhuri ya Muungano wa Tanzania Mhe. Mizengo Pinda leo wakati akifungua rasmi Maonesho ya 22 ya Nane Nane kitaifa mwaka huu katika viwanja vya Ngongo Mkoani Lindi.


“Nimetembelea mabanda mengi nimefarijika sana na nimevutiwa na mambo mengi ya kilimo na maandalizi mazuri yanayopamba maadhimisho haya, katika mabanda hayo nimevutiwa zaidi na banda la Jeshi la Kujenga Taifa (JKT).


“Wamelima mboga mboga, mchicha, vitunguu, biringanya, mahindi, matango na nyanya. Wote mliokuja kwenye maonesho haya mkajifunze uzalishaji huo ni wa muhimu kwa kila mtu”alisema  Waziri Mkuu Pinda.


Aidha, Waziri Mkuu ameiongezea kanda ya kusini miaka miwili zaidi na kuandaa maonesho hayo kitaifa na hivyo yatafanyika miaka mitano mfululizo ambapo yanatarajiwa kujumuisha mwaka 2014 yalipoandaliwa kwa mara ya kwanza hadi 2018.


Muda huo umeongezwa ili kuendelea kufungua na kuboresha miundo mbinu ya viwanja vya Ngongo mkoani Lindi na mikoa ya kusini kwa ujumla ikiwemo huduma za jamii ndani ya mikoa hiyo na kuongeza hamasa ya ushiriki kutoka taasisi za Serikali, Mashirika ya Umma pamoja na asasi mbalimbali nchini.


Kwa upande wake mkazi wa eneo la Ngongo kijiji cha Tulieni kata ya Mnazi Moja Mkoani Lindi mzee Shaibu Said Chibebedenge amesema kuwa maonesho ya mwaka huu yamaendelea kuwa bora zaidi kuliko mwaka uliopita kwa kuongezeka ubora wa miundo mbinu ikiwemo barabara ndani ya viwanja vya Maonesho.


Maonesho ya Nane Nane nchini yameanzishwa rasmi mnano mwaka 1993 ambapo hadi sasa yanaendelea kote nchini kupitia kanda saba ambazo ni Arusha, Dodoma, Morogoro, Mbeya, Mwanza, Tabora na Lindi ambapo maonesho hayo yanafanyika kitaifa kwa mara ya pili mfululizo yakiongozwa na kauli mbiu isemayo “Matokeo Mkubwa Sasa, Tuchague Viongozi Bora kwa Maendeleo ya Kilimo na Ufugaji”.